ஞாயிறு, ஜனவரி 19 || தெளிதேன் துளிகள்

Honey Drops for Every Soul
Jan 19
1 min read

வாசிக்க : எபேசியர் 6:10-18

தேவனின் சர்வாயுதவர்க்கம்!

நீங்கள் பிசாசின் தந்திரங்களோடு எதிர்த்துநிற்க ... தேவனுடைய சர்வாயுதவர்க்கத்தையும் தரித்துக்கொள்ளுங்கள். (எபேசியர் 6:11)

ஆவிக்குரிய சர்வாயுதவர்க்கத்தில் பவுல், முதலாவது குறிப்பிடுவது இடைக்கச்சை. கச்சை ஒரு போர்வீரனுடைய உடைகளை அவனது உடலோடு பொருந்தியிருக்கச் செய்து, தடையின்றி முன்னேற உதவி செய்கிறது. இயேசு சத்தியமாக இருக்கிறார். அவரது வார்த்தை சத்தியமாயிருக்கிறது. எனவே, ஒரு கிறிஸ்தவனது நடை சரியாக இருக்கத் தேவை சத்தியம் எனும் இடைக்கச்சை! இரண்டாவதாக அவர் குறிப்பிடுவது மார்க்கவசம். மார்க்கவசம் இருதயத்தை பாதுகாக்கிறது. ஒரு கிறிஸ்தவன் தன் இருதயத்தை இயேசுவுக்கு நேராய் திருப்பி அதைக் காத்துக்கொள்ள நீதி எனும் மார்க்கவசம் அவசியம். மூன்றாவதாக பவுல் சொல்வது பாதரட்சை. அது இடறிவிடாமல் முன்னேற உதவுகின்றன. கிறிஸ்துவின் போர்வீரனும் அப்படியே சுவிசேஷம் அறிவிக்க எந்நாளும் தயார் நிலையிலிருக்கவேண்டும். நான்காவதாக கேடகம். கேடகம் ஒரு வீரனை எதிரி வீசும் கணைகளிலிருந்து காக்கும் உறுதியான நீள்வட்டமான தடுப்புக் கவசம். அதுபோன்றே பிசாசு எரியும் அக்கினியாஸ்திரங்கள் தன் ஆவி ஆத்துமா சரீரத்தைத் தாக்காமல் காக்க ஒரு கிறிஸ்தவன் தேவன்மீது வைக்கும் விசுவாசம் எனும் கேடகத்தைக் கையாளுவது அவசியம். ஐந்தாவதாக, எதிரியைத் தாக்கி முறியடிக்க வேண்டிய உத்திகளை சிந்தித்து செயல்படுத்தும் மூளை அமைந்துள்ள தலையைக் காக்கும் தலைக் கவசம். இரட்சிப்பு என்கிற தலைக்கவசமே ஒரு மனிதனுடைய ஆத்துமாவைக் கிறிஸ்து இயேசுவுக்குள்ளாகப் பாதுகாக்கும். கடைசியாக, பட்டயம், இது தற்காப்புக்கும், எதிரியை வீழ்த்துவதற்கும் பயன்படும் ஆயுதம். தேவ வார்த்தையாம் ஆவியின் பட்டயம் அப்படிப்பட்டதே! அதை உபயோகிக்கும்போதுதான் நமது வெற்றி சாத்தியமாகிறது.

அன்பானவர்களே, இந்த தெய்வீகப் போராயுதங்களை நாம் தரித்துக்கொண்டுள்ளோமா என்று உறுதிசெய்துகொண்டு, பிசாசானவனுக்கு எதிர்த்து நின்று, அவனை மேற்கொள்வோம்.

ஜெபம்: தேவனே, எதிரியான சாத்தானிடமிருந்து என்னைக் காத்துக் கொள்ளவும், அவனை முறியடித்து வெற்றி சிறக்கவும் உமது சர்வாயுத வர்க்கத்தை எனக்குக் கொடுத்திருக்கிறீரே உமக்கு நன்றி. அதை எப்போதும் அணிந்து என்னைத் தப்புவித்துக்கொள்ள எனக்கு கிருபை தாரும். ஆமென்.

Our Contact:

EL-SHADDAI LITERATURE MINISTRIES TRUST, CHENNAI - 59.

Office: +91 9444456177 || https://www.honeydropsonline.com